Hörður tapaði 27-51 fyrir HK á heimavelli

Hörður mætti HK í leik þar sem gestirnir höfðu betur. Hálfleikstölur voru 18-23 HK í vil og lokatölur eftir 60 mínútna leik voru 27-51. Liðið var ánægt með fyrri hálfleikinn gegn sterku liði HK. Sá síðari var mun erfiðari og keyrt var á fleiri mönnum en í þeim fyrri.

Í færslu félagsins segir að tölurnar skipti ekki mestu máli í augnablikinu, heldur hvernig liðið nálgast verkefnin og hvernig það klárar þau. Margt jákvætt var í fyrri hálfleik sem liðið ætlar að nýta í komandi leikjum, og margt þarf að laga sem verður unnið í á æfingum vetrarins.

Hörður þakkar áhorfendum góðan stuðning, en óvenju góður fjöldi lét sjá sig og studdi liðið allan tímann. Einnig þakkar félagið HK-ingum fyrir drengilega og góða viðureign, sem og dómaraparinu, Herði og Bóasi, sem að sögn félagsins var til fyrirmyndar.