Hörður vann SelfussU 40-33 á Torfnesi

Hörður vann SelfussU 40-33 á heimavelli handboltans, Torfnesi, í kvöld í mikilli stemmningu. Allir leikmenn liðsins áttu afar góðan leik. Markahæstir voru Endijs Kusners með 10 mörk, Guntis Pilpuks með 8 og Óli Björn með 7 mörk, en hann sýndi mikið öryggi af vítalínunni. Félagið er sérstaklega stolt af Sigurði Óla Rúnarssyni, sem náði í skóna upp af hillunni og tók verulegan þátt. Stefán Freyr, Sudario og Ásgeir áttu einnig góðan leik, en Ásgeir var að dimmitera allan daginn.

Carlos Martin Santos þjálfari sagðist vera stoltur af leikmönnunum, sem hefðu lagt sig mikið fram í vetur til að tryggja sæti í úrslitakeppninni. Leikjaálagið sé nú stíft og liðið hlakki til að enda veturinn af krafti. Næsti leikur er gegn Fjölni á þriðjudaginn.

Víkingur vann Vængi Júpíters í kvöld. Því er ljóst að Víkingur eða HK mætir Herði í undanúrslitum deildarinnar, en Kría og Fjölnir mætast í hinni viðureigninni. Miðað við stöðuna í deildinni eru Vængir Júpíters og Fram HandboltiU fallin í 2. deild. Þá kemur fram að Haukar Topphandbolti U-lið spiluðu á þriðjudaginn var gegn Herði með of marga leikmenn sem höfðu spilað síðasta meistaraflokksleik í úrvalsdeildinni. Hörður hefur komið skýrum skilaboðum til HSÍ um að félagið vilji ekki að úrslitum leiksins verði breytt, enda eigi úrslit handboltaleikja að ráðast á vellinum. Félagið þakkar einnig Handbolti.is og Handboltinn okkar podcastinu fyrir umfjöllun um deildina í vetur.