Pedro Nunes ráðinn aðalþjálfari meistaraflokks karla hjá Herði

Handknattleiksdeild Harðar hefur ráðið portúgalska þjálfarann Pedro Nunes sem nýjan aðalþjálfara meistaraflokks karla til næstu þriggja ára. Samningstíminn er frá 15. júlí 2025 til 15. maí 2028. Pedro er 37 ára og með EHF Mastercoach Pro leyfi. Hann starfaði síðast sem aðstoðarþjálfari Boa Hora í efstu deild Portúgals, eftir tímabil sem aðalþjálfari hjá NA Samora Correia í 3. deild. Hann þjálfaði einnig London GD Handball Club í Super 8 League, sem varð Englandsmeistari, endaði í 2. sæti í ensku bikarkeppninni og tók þátt í EHF Cup og Challenge Cup. Pedro er með B.Sc. gráðu í hugbúnaðarverkfræði.

Auk meistaraflokksins mun Pedro stýra U18 liði félagsins og bera ábyrgð á allri handboltaþjálfun og starfsemi innan félagsins. Félagið segir það í takt við stefnu sína um öfluga uppbyggingu og gæði í öllum aldursflokkum. Á næstu dögum verða kynntir nokkrir nýir leikmenn sem hafa þegar samþykkt að ganga til liðs við félagið, og áherslan er á að byggja upp með ungum leikmönnum og veita heimamönnum tækifæri.

Hörður þakkar leikmönnum sem hafa lokið samningum sínum við félagið: Jonas Maier, Oliver Rábek, Lubomyr Ivanitsya, Kenya Kasahara, Ólafur Brim Stefánsson, Daníel Wale og Guðmundur Brynjar Björgvinsson. Þá hefur Kenta Isoda verið kallaður heim af Wakunaga, og félagið þakkar honum fyrir dvölina á Ísafirði.